Suicide: చెరువులో దూకి సాఫ్ట్‌వేర్‌ ఇంజినీర్‌ ఆత్మహత్య

జగ్గయ్యపేట: చెరువులోకి దూకి సాఫ్ట్‌వేర్‌ ఇంజినీర్‌ ఆత్మహత్య చేసుకున్న ఘటన కృష్ణా జిల్లా జగ్గయ్యపేట పరిధిలో చోటుచేసుకుంది. మంగళగిరి మండలం నువులూరుకు చెందిన శ్వేత (22) చిల్లపల్లి వద్ద చెరువులోకి దూకి బలవన్మరణానికి పాల్పడింది. గత మూడు నెలలుగా వర్క్‌ప్రమ్‌ హోం ద్వారా విధులు నిర్వహిస్తున్న శ్వేత.. ఆదివారం ఆప్టమ్‌ సంస్థల్లో విధుల్లో చేరాల్సి ఉంది.

అయితే శనివారం సాయంత్రం 5 గంటలకు ఇంటి నుంచి బయలుదేరిన యువతి.. తాను ఆత్మహత్య చేసుకుంటానంటూ రాత్రి 8 గంటలకు తల్లికి వాట్సాప్‌లో మెసేజ్‌ పంపింది. దీంతో ఆందోళన చెందిన కుటుంబసభ్యులు స్థానిక పోలీస్‌స్టేషన్‌లో ఫిర్యాదు చేశారు. అనంతరం పోలీసులు గాలింపు చేపట్టారు. ఈ క్రమంలో జగ్గయ్యపేట మండలం చిల్లపల్లి చెరువులో శ్వేత మృతదేహాన్ని గుర్తించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.